買經屋等於變相租樓？

經屋T3單位建築面積85平方米，即係85*10.76=914.6平方尺。每尺售價4000，即係單位售3658400元。

由於買經屋相當於將樓款0息存入政府度，搬走先攞得返，可以當成其實係度「租」經屋，假設通賬3%，樓款每年損失嘅購買力3658400*3%=109752元就可以當成每年嘅「租金」，除返12個月，剛好月租9146元。

實用率約72%，即係買T3經屋，係相當於用9146元去租一個建築9146尺，實用*72%=658尺嘅同等質素單位。

咁到底算唔算平？

以上係好粗淺嘅講法，比如仲應該考慮到

1. 如果用房屋局聲稱實用面積價格5000一尺計，單位售約3289332元，而澳門日報報導聲稱單位售約300萬，我唔知點解。
2. 計算係假設一炮過付全部樓款，咁通常都會做按揭的，這下就好玩了：由於暫時按揭利率未高過通賬，所以將借按揭利息考慮埋落去唔會令結果高過9146，甚至可能稍低於此數；不過他日加息3、4次嘅話，可能就會高過呢條數了。
3. 比起出面租樓，經屋你當係業主方死約，理論上永遠無得逼遷。
4. 比起出面租樓，經屋永遠唔「加租」同「減租」；如果做按揭而第日加息係會令「租金」上升，不過幅度好有可能小過市場升幅。
5. 條數係抽象來講嘅結果，即係等你第日搬屋售返俾房局時，收返300幾萬後「打返埋欄」當係咁多年用咁多錢租左嗰個單位，但你買嗰下要一下俾一筆錢出來，供樓時供款亦多過就咁租樓，可能當下會係唔小負擔。
6. 根據以往經驗，就算以前有得搏升值轉售時，經屋通常日子耐左保養都好麻麻，依家無得搏，業主保養嘅動力會更低。